Sinatria nu kapilih, Wangi Akhlak Seungit Iman
=====================
Silih asih mere seungit
Silih asah ku wawangi
Dugina ka Siliwangi
Silih deudeuh beda pikir
Silih geugeut benten pipi
Nepina ka Siliwangi
Sapapait samamanis
Mun pait ditampi seuri
Mun amis ditampa ceurik
Seuri ceurik jadi leuwi
Leungit napakkeun wawangi
Pasrah sumerah sajati
Sabatin saleuwi asih
Melak asih ku kapeurih
Disiram sabar nu lantip
Bareng satia ngajagi
Silih ngait ajen diri
Buahna hurip nu sigih
Saksina ti payun dugi
Para nonoman nu sakti
Dangiang beunghar kinasih
Pangeran nu moksa galih
Sinatria nu kapilih
Mirig Prabu Siliwangi
__________
Kaagungan Pajajaran
Ngahaja ditunda heula
Leungit teu aya sesana
Dugi ka cunduk waktuna
Para Pangeran nu moksa
Lumungsur ka Pajajaran
Kiwari wanci mustari
Pangeran tos lahir deui
Indung solehah nu nampi
Bapa mutakin (taqwa) nu nyanggih
Awak anyar rohna sami
Sagala elmu kajait
Saseungit hing sawawangi
Lain wawangi malati
Sanes puspa rampe kantil
Seungit paripolah wening
Wangi kaihlasan batin
Silih seungit silih wangi
Seungit sanes samanea
Nyambuang ti wening manah
Hiliwir sumping ti Uga
Buktos manunggaling Gusti
Amal ibadah katampi
Seungitna ngolembar dugi
Wangina ngecrikan nyaah
Seungitna ngulem kaasih
Balarea ararasih
Paheula heula darongkap
Lir kumbang mabok ka kembang
Asihan titipan Gusti
Linuhung junun ma’rifat
Kaweruh Nabi kaudag
Wangi Akhlak seungit Iman
Purbatisti Purbajati
Mugi tiasa kasanggih
Jadi daging janten getih
Tangtos wangina ngolembar
Kaseuseup jalma sadunya
Salengkah sapamuntangan
Lengkah endah gerak Gusti
Lengkah gagah nyaah Allah
Rahayat teu ngarasa boga
Pamingpin jempling ka wenang
Napas Allah anu nyangga
Sapancuran sakocoran
Keclakan cipanon Adam
Kocor peurih asih Hawa
Puseurna Sunda
Getihna ti Dienul Islam
Tunggal ummatan wahidan...
(Dikutip dina:
Pantun “Niskala Purbajati”
Karya: R.M. Imam Mudrika Sanusi)
~Tunggul Wangi Sajati~
0 Komentar